وداعا 2022 .. و خلينا نختمها بحاجه حلوه و نبدأ 2023 بأهداف عظيمه ❤️❤️

هتكلم النهارده علي جزء مهم في مجال الFreelancing

– الحاجات اللي هتساعدك بنسبه كبيره بعد ما تخلص مذاكره انك تبدأ في العمل الحر و كلامي هيبقي موجه اكتر للناس اللي بتبدأ في الTracks و بتستهدف شغل الFreelancing بعد ما يخلص

في البدايه حابب اقولك ان بفضل ربنا السنه دي اشتغلت تقريبا 1,000 ساعه علي المنصه و بقيت Top-rated في خلال 6 شهور و بإذن الله خطوات بسيطه و ناخد ال Top-rated Plus ( دعواتكم 🙏 )

بقولك كدا ليه ؟
علشان تشيل من دماغك فكره شغل الFreelancing صعب .. وانك مش هتلاقي شغل بل العكس الشغل كتير جدا و بينزل كل دقيقه ( منافسه كبيره ايوا بس الشغل اكتر بكتير )

خلينا نتكلم الأول علي الشباب اللي بيذاكروا tracks و بإذن الله يبدأوا freelancing بعد ما يخلصوا التراك علطول :

لازم دايما يبقي عندك خلفيه علي طبيعيه الشغل اللي هيطلب منك بعد ما تخلص و مُلم بسوق اللي حواليك لان دا هيخيلك تركز علي Topics معينه في التراك بتاعك

طب هعرف دا ازاي ؟
ببساطه شديده هتخش علي مواقع الfreelance و تقرأ الJob description كويس جدا و لو تعرف تعملها ك Task مع نفسك أعملها

مثال بسيط : لو انت حاليا بتذاكر Python و دخلت دورت علي شغل لها و لقيت اغلب ال Jobs بتطلب Web scrapping
يبقي دي حاجه من ضمن الحاجات اللي هتركز عليها و انت بتذاكر و قيس المثال دا علي اي تراك

من اهم الحاجات اللي هتساعدك تشتغل بسرعه بعد ما تخلص التراك .. انك دايما تعمل مشاريع و انت بتذاكر و أفضل مشاريع هتعملها هتبقي من مواقع الFreelancing بردو و تجمعها علشان تبقي في الPorftolio بتاعك و تكون محدد لنفسك وقت تخلص فيه المشروع زي ما العميل طالب لان كدا انت بتحاكي الواقع و بتعود نفسك ع الضغط و انك تنجز في الشغل بأسرع ما يمكن

في خطاء ناس كتير بتقع فيها لازم تاخد بالك منه مدام انت في بدايتك و هو ان بعد ما يخلص التراك.. مش بيلاقي مشاريع كامله يقدمها و بيضطر انه يضيع في وقته علشان يعمل مشاريع يعرضها .. و دا بسبب انه بيعتمد علي كورس اللي بيذاكره بس و مش بيطبق مع نفسه

و الحل انك بعد ما تخلص اي كورس .. تطبق مع نفسك 3 – 5 مشاريع لوحدك و كل دا هيفيدك بعدين و هتوصل لمرحله انك مش عارف تحط انهي مشاريع من كترهم

خلينا نتكلم في أهم حاجه تركز عليها و تبدأ تطور نفسك فيها بدري و هي الإنجليزي الإنجليري الإنجليري

قناه ZAmericanEnglish هتكفيك و زياده و تبدأ تتباع الLevels بتاعتها ( اللينك هسيبه في الComments )
و تكون عامل حسابك ان في حالات كتير جداا هتخش Meetings و تتناقش و تعرض افكارك و تقدم حلول .. فا الإنجليزي يبقي جرء لا يتجزأ من يومك

و أخيرا حاول تقسم يومك و وقتك ع قد ما تقدر و حط في دماغك انك هتتعب في البدايه ممكن شهر.. اتنين تلاته.. سنه !! بس هتلاقي حصاد تعبك دا في الأخر ( ولله دا اللي حصل معايا السنه دي بفضل ربنا الحمدلله )

أعمل لنفسك Todo-list للسنه دي اكتب فيها كورسات تخلصها و اهداف عايز تحققها و ربنا هيوفقك بإذن الله